Bouchra El – Charabaty

..اليوم عيد الاستقلال بأميركا

اليوم فُرصة

وعيت ع مهل

عملت فنجان قهوة

..منقوشة زعتر

حرقتها شوي

!بس يلّا

..أصلاً هي أطيب محروقة

حطيت موسيقى

احلى شي فيروز

مع القهوة

مع المنقوشة

..مع الصبح البطيء

اجت غنية

“رُدّني الى بلادي”

صَفَنت

رُدّني الى بيروت؟

كيف هيك؟

!ما انا هون

واليوم عيد الاستقلال

بدنا نحضر العرض العسكري

ومحضّرة تيابي من مبارح

..والمشاوي جاهزين

كيف يعني رُدّني الى بلادي؟

وين بلادي اصلاً؟

هون مش بلادي؟

طيب هونيك بعده بلادي؟

ليش عم اسمعك فيروز؟

ليش مش اغاني بالانكليزي؟

!كيف هيك؟

بنترك وطن فيه كل هويتنا

تَ نّبش ع مستقبل

ع بُكرا احلى

..إلنا ولأولادنا

بنتعلّم تقاليد جديدة

..اعياد وحفلات وطبخات

حتى نمط حياة

..وطريقة لبس

بس كمان

بنّبش ع نسمة من لبنان

ع منقوشة زعتر

معمولة بعجينة

مش معروف شو طعمتها

!بس فيها حبّة زعتر

!خلص هيدي من عنّا

ننبش ع ريحة الصّيفيّة

وضحكة أهلنا

وتبّولة الماما

والضّيعة

والفواكه

والجار الحشّور

اللي بيراقب حركة التجول

بيعرف مين راح ومين اجى

مين جاب تلفزيون جديد

!مين غَيّر مسّاحات سيارته

!ضابط الأمن

بنّبش ع كتير اشيا

..وما بنلاقي حالنا بينن

“الحمدلله اللي منكن هون”

بس نحن

..مش هونيك ولا هون

!شو بيعرفني

..يلا تقوم إلبس، تأخّرت

..صباح الخير، فيروز

❤️💙🤍وينعاد عليكِ، أميركا