Bouchra El – Charabaty

صارت الاشارة حمرا

يا الله! ما لحقت امرء

هلق بتأخر

بيقولوا عني بلا ذوق

شو فرقت، اصلاً عطول مفشكلة حياتي

بنطلون من هون، بلوزة من هونيك

سكربينتي مدحوشة شي محل..

شو بدي إلبس عشيّة؟

ما بعرف، هلق بس ارجع بتطلّع..

معقول يجي الليلة؟

ما بيضهر كتير، بس بركي

إنو منتسلّى، بنغيّر جو…

للصراحة؟

اشتقت له

اشتقت لحركاته

اشتقت لغمزة عينيه اللي ما بيعرف يعملها

اشتقت لعجقته

لتقالة دمه…

اشتقت اطّلع بعيونه، وما قول شي

اضحك هيك..

عيونه بتضحّك

فيها شي، إنو، هيك مهضومين

بيضوّوا

متلو…

بيقعد حدّي

بيصير يخبّرني خبار بلا طعمة

كَتّير حكي

بس مهضوم..

بحب بس يحكي، ولو بلا طَعمة..

في نغمة هيك بصوته

حنونة

هو اصلاً حنون

بس ما بيحب يبيّن

قال قابض حاله جدّ..

بحب بس يسكت، ويطّلع فيّي..

لو بيقولها وبيخلّصنا

وبيخلّصني..

معقول يقولها الليلة؟

إنو انشالله،

ما بعرف…

شو في يا عمّي، ليش عم تزمّر؟!

ييي، ضوّت الإشارة..

تَ نمشي..

إنشالله شوفه الليلة..